Eqqartuussissuserisoqarfiup Malling & Hansen Dammip inissisimaffia:
Hans Egedesvej 3
Postboks 1046
3900 Nuuk
Oqarasuaat +299 32 34 00
Fax +299 32 38 68
Mail mhdlaw@malling-hansendamm.gl
Eqqartuussissuserisoqarfik Malling & Hansen Damm Wilhelm Malling Niels Hansen Dammilu eqqartuussissuserisutut akisussaasutut siuttoralugit ingerlatseqatigiiffittut aaqqissugaavoq.
Allatut allakkatigut isumaqatigiissusiortoqarsimanngippat Eqqar-tuussissuserisoqarfimmi Malling & Hansen Dammimi ingerlatsinermi suliassatut tigusatsinni piumasaqaatit atuuppuut.
Eqqartuussissuserisoqarfimmi Malling & Hansen Dammimi atorfillit Qallunaat Nunaanni inatsisinik atortitsinermut ministeriaqarfim-mit pisinnaatitaaffeqartitaapput, taamatullu Advokatsamfund-imut i-laallutik.
Soqutigisatigut imaluunniit tatiginassutsikkut aporaaffiusinnaasut
Suliassaq aallartitsinnagu soqutigisatigut tatiginassutsikkullu eqqartuussissuserisut sullitassartik sullissinnaannginnerannut kinguneqarsinnaasunik malunnartoqarnersoq Eqqartuussissuserisoqarfik Malling & Hansen Dammimit misissuiffigeqqaarneqar-tarpoq.
Soqutigisat aporaaffiusinnaasut pillugit maleruagassat atuuttut ataqqillugit sullitassap suliaasa iluini inuit allat ingerlatseqatigiiffiilluunniit allat siunnersorsinnaanerannut suliassanik eqqartuussissuserisut isumaginnissinnaanerat akornuteqanngilaq.
Kinaassutsimik paasissutissat pinerlunnikkullu aningaasanik malunnarunnaarsaanerit
Nunatsinni Qallunaat Nunaannilu eqqartuussissuserisut suliffeqarfinnut tamanut assingusumik pinerlunnikkut aningaasanik malunnarunnaarsaaneq pillugu pinaveersaartitsinissaq siunertaralugu suliniuteqarnissamut Eqqartuussissuserisoqarfik Malling & Hansen Damm inatsit malissallugu pisussaaffeqarpoq.
2010-mi januarip aallaqqaataanit atuuttumik nunatsinni eqqartuussissuserisumit kiffartuunniarneqaraanni kinaassutsinut paasissutissat tunniuteqqaartariaqarput, tassaappullu ateq, najugaqarfik, taamatullu CPR-, GER- imaluunniit CVR-normu.
Eqqartuussissuserisumik suleqateqalernissaq aallarnerfigalu paasissutissat pineqartut tunniunneqassapput. Eqqartuussissuserisunik siornatigut kiffartuunneqarsimagaanni paasissutissalli pineqartut tunniussimanngikkaanni tamanna isumageqqaartariaqarpoq.
Akiliutissat, akiligassiinerit sullitallu pigisaat
Aalajangersakkat arlaqartut aallaavigalugit eqqartuussissuseris-ut akiligassiisarput. Tassaapput piffissaq atorneqartoq, inatsisilerituut suleqataasut immikkut ilisimasaqarfiisa misilittagarisaasalu suuneri, suliassap qanoq artornartigisinnaanera sullitamullu qanoq pingaaruteqartiginera, pineqartut nalillit annertussusaat, suliassap naammassinerani angusat, suliassaq piffissarititap iluani annertuumik pinartunik suliassaqartitsisimanersoq sulinerullu naliginnaasup avataani ingerlanneqarsimasariaqarsimanersoq, taamatullu suliassiissutigineqartumut atatillugu naammassinninnissamut akisussaaffik.
Eqqartuussiveqarfimmut akiliutissanut, angalanernut najugaqarfissanullu aningaasartuutissanut, annertuumik pappialanik kopiiliortitsinissanut kiisalu nutserinernut aningaasartuutaagallarsimasut eqqartuussissuserisunut akiliutissat avataaniipput.
Suliassap aallartinnginnerani akiliutissaq aningaasartuutissallu akilerallagassat akileqqaarneqarnissaat piumasaqaatigisinnaavarput.
Sioqqutsilluni akiliutit, akilerallakkat aningaasartuutillu allat kontomut sullitamut immikkoortitamut inissinneqartarput, taamatullu allatut isumaqatigiissusiortoqarsimanngippat kingorna akiligassanut aningaasartuutinullu allanut akiliutissatut atorneqarsinnaallutik. Suliassap suliarineqarnerata nalaani erniarineqartut maleruagassat naapertorlugit sullitamut tunniunneqassapput.
Kiffartuussinerup naammassineqarnerani naliginnaasumik akiligassaq eqqartuussissuserisunit nassiunneqassaaq. Allatut isumaqatigiissusiortoqarsimanngippat ataavartumik siunnersuinerni suliassiissutillu sivisuumik suliarineqassagaangata piffissap atorneqarsimasup annertussusaa aallaavigalugu akiligassat naafferartumik, kiisalu ukiup affakkaartumik, akileqquneqartarput.
Nunatsinni moms atorneqanngimmat akiligassanut ilassutigineqarneq ajorpoq.
Akiligassap ullulerneqarnera naapertorlugu ullut 14-it qaangiutsinnagit akilerneqarnissaa piumasaqaataavoq.
Kingusinaartumik akiliinikkut erniortitsinermut inatsit naapertorlugu akiligassat erniortinneqalissapput.
Tatigeqatigiinneq
Eqqartuussissuserisutut nipangiussisussaatitaavugut. Kiffar-tuussinerni paasisat tamarmik allanut oqaatigeqqusaangilagut.
Siunnersuinitsinnik atuinerit
Siunnersuinivut suliassiissutinut aalajangersimasunut attuumassuteqarput, uagullu sioqqutsisumik erseqqissumik akuersisimatinnata siunertanut allanut atoqqusaanatik. Allatut isumaqatigiittoqarsimanngippat sullitatsinnut naammassisumik siunnersuinerput sullitatsinnut taamaallaat atuuppoq.
Suliarisamik naammassinninneq
Suliassiissutigineqartup pissusissamisoortumik naammassinissaata tungaanut, imaluunniit suliassiissutigineqartup unitseqquneqarnissaata tungaanut suliassaq isumagisussaavarput. Taamaattorli akiligassanik allakkatigut nukingisaarisoqaraluartoq kingusippallaamik akiliinikkut, imaluunniit sullinneqartoq akiliisinnaajunnaarluni nalunaaruteqarpat suliatta erngertumik unitsissinnaanissaanut pisinnaatitaavugut. Taamatullu immikkut ittumik patsiseqarluta suliassiissutigineqartoq akisussaaffigisinnaajunnaarlugu takusinnaagutsigu, imaluunniit suleqatigiinnerup taamaatinnissaa suliassiisumut pingaaruteqartoq takusinnaagutsigu suliarineqartoq peqataaffigiunnaarlugu unitsissinnaavarput.
Allagaatit suliamut attuumassuteqartut suliassiissutigineqartup naammassinerani naliginnaasumik utertinneqartarput, suliallu ingerlanerani paasissutissat allattorneqarsimasut akiligassap ullulernerata kingorna minnerpaamik ukiuni tallimani toqqortarineqartarlutik.
Naammagittaalliutit
Naammagittaalliornissaq pillugu Advokatsamfund-imi naliginnaasumik maleruagassat Eqqartuussissuserisoqarfimmit Malling & Hansen Damm-imit malinneqartussaatitaapput.
Sullinneqartoq sullissinitsinnik imaluunniit akiligassaminik naammaginninngippat paatsuunganarsinnaasut erseqqissarnissaat sullitamullu naammaginartumik naammassinnissinnaaneq siunertaralugu piginneqataasoq sullinneqartumit attaveqarfigeqqusarparput.
Inatsimmik toqqaaneq sumilu eqqartuussivilersuussinissaq
Sullinneqartup Eqqartuussissuserisoqarfiullu Malling & Hansen Dammip akornanni isumaqatigiinngissutit suugaluartulluunniit nunatsinni Qallunaat Nunaanilu inatsisit naapertorlugit nunatsinni eqqartuussivimmi pisinnaatitaasumi naammassiniarlugit ingerlanneqassapput.
Akisussaaffik, akisussaaffiup killilernera sillimmasiinikkullu matusisinnaaneq
Nunatsinni Qallunaat Nunaannilu inatsiseqarnikkut maleruagassat naliginnaasut naapertorlugit inatsisilerinikkut siunnersuinerni Eqqartuussissuserisoqarfik Malling & Hansen Damm akisussaassuseqarpoq.
Eqqartuussissuserisoqarfik Malling & Hansen Dammimi eqqartuussissuserisut tamarmik suliffeqarfiup akisussaaffeqarnikkut qularna-veeqqusiinermullu aaqqissuussamut Codan Forsikring A/S-imi sillimasiisimanermut ilaatinneqarput. Eqqartuussivilerineq sumiluunniit ingerlanneqaraluarpat akisussaaffeqarnikkut sillimmasiineq eqqartuussivilerinernut tamanut atuuppoq.
Sullitatsinnulli akisussaaffik eqqartuussissuserisarfimmi akisussaaffeqarnikkut sillimmasiisimanermi taarsiivigineqarnissamut qummut killigititat tamatigut killiliipput. Tamakku pillugit annertunerusumik paasisaqarusukkaanni eqqartussissuserisarfimmut saaffiginnittoqarsinnaavoq.
Akisussaaffik uatsinniittoq suliap malitsigisaanik aningaasanik annaasaqarnernut attuumassuteqanngilaq, tamatumanilu ingerlatsi-nermi annaasat, paasissutissanik annaasaqarneq, isertitassanik kiisalu isigineqarnermik avammullu kiinnersimanermik an-naasaqarneq il.il., imaluunniit toqqaannanngikkaluamik annaasaqarnerit ilaatinneqarlutik.
Siunnersuisutut innersuussutigineqarsimasut kukkuluttorneri eqqartuussissuserisoqarfimmiit akisussaaffigineqanngillat, taamatullu sullitamik isumaqatigiissuteqarnikkut pilersuisut allat kukkuluttorsinnaanerinut eqqartuussissuserisoqarfik sullitamik isumaqatigiissuteqarnikkut, piginneqataasut suleqataasullu akisussaaffeqartinneqarsinnaanatik.